ভৈয়ামৰ তিৱা সকলৰ বিহুগীতক লৈ এইবাৰ মৈত্ৰেয়ী পাটৰৰ “লালৈ লালুঙনী”-
মৈত্ৰেয়ী পাটৰ.. অসমীয়া সংগীত জগতত আলোড়ণৰ সৃষ্টি কৰা এই সংগীতশিল্পী গৰাকীৰ ৰচনা আৰু কণ্ঠই মুগ্ধ নকৰা অসমীয়া শ্ৰোতা হয়টো বহুত কমেই ওলাব অথবা নোলাব। অসমীয়া সংগীতত নতুন ধাৰাৰ সৃষ্টি কৰি এক ব্যতিক্ৰমী প্ৰচেষ্টাৰে শ্ৰোতাক আকৰ্ষণ কৰা মৈত্ৰেয়ী পাটৰৰ অনুৰাগীৰ শাৰী বৰ্তমান দীঘলীয়া। “প্ৰজেক্ট বাৰ্তালাপ” ৰ গুৰিধৰোতা মৈত্ৰেয়ী পাটৰৰ আহিবলগীয়া নতুন গীতটিয়ে শেহতীয়াকৈ উৎসাহিত কৰি তুলিছে সকলোকে। মৈত্ৰেয়ী পাটৰৰ গীত সমূহত কেৱল মনোৰঞ্জনেই নহয়, থাকে নতুন আশা-নতুন বিষয়বস্তুৰ লগতে নতুন শব্দৰ সম্ভাৰ। মুঠতে, শ্ৰোতাক প্ৰতিটো দিশৰ পৰা এটা গীতেৰে প্ৰশান্তি দিয়াৰ চেষ্টা কৰে তেওঁ। সকলোৰে প্ৰিয় সংগীতশিল্পীৰ ভিতৰত অন্যতম মৈত্ৰেয়ী পাটৰ পুনৰ বাৰ সাজু হৈছে এটি নতুন প্ৰকল্পৰ সৈতে। তেওঁৰ এই প্ৰকল্পটোৰ আৰম্ভণিৰ উৎস ১৫ বছৰ পুৰণি আৰু পৰিকল্পনা ডেৰ বছৰৰ। দীঘলীয়া এটি পৰিক্ৰমাক লৈ গীতটিৰ বাবে তেওঁ কৰা প্ৰস্তুতিখিনি কিন্তু একেবাৰে নতুন। ভৈয়ামৰ তিৱা লোকসকলে গোৱা বিহুগীত সমূহক লৈ তেওঁ শীঘ্ৰে মুকলি কৰিবলৈ সাজু হোৱা বিহুগীতটিৰ নাম হৈছে “লাহৈ লালুঙনী”।
গীতটিৰ কথা আৰু সুৰৰ দায়িত্বত আছে ৰূপকৃষ্ণ পাটৰ। সংগীত আৰু ব্যৱস্থাপনা কৰিছে পৰাণ বৰকটকীয়ে, শব্দ সংমিশ্ৰণৰ দায়িত্ব ৰূপায়ণ কৰিছে ইবচন লাল বৰুৱাই। লগতে, গীতটিৰ ভিডিঅ’ পৰিচালনা কৰিছে ৰাষ্ট্ৰীয় পুৰষ্কাৰপ্ৰাপ্ত জনপ্ৰিয় পৰিচালক সমুজ্জল কাশ্যপে। চিনেমেটোগ্ৰাফী নগেন বৈশ্যৰ আৰু সম্পাদনা কৰিছে গৌতম মজুমদাৰে। অহা শুকুৰবাৰে মুক্তি পাবলগীয়া এই গীতটিৰ প্ৰডাকচন চাইছে মনোৱাহ বেনীয়ে। বৃহত্তৰ অসমীয়া জাতিটোৰ অবিচ্ছেদ্য অংগ বিভিন্ন জাতি-জনগোষ্ঠীৰ কৃষ্টি- সংস্কৃতিৰ সৈতে নিজকে সাঙুৰ খোৱাই থলুৱা তথা পুৰণি গীত-মাতক জনসাধাৰণৰ মাজত উলিয়াই আনিবলৈ উঠি অহা প্ৰজন্মৰ সংগীতশিল্পী সকলৰ যি দূৰ্বাৰ হেঁপাহ তথা নিৰলস প্ৰয়াস, সেয়া সঁচাকৈ উল্লেখনীয়।
“লাহৈ লালুঙনী” ৰ বাবে মৈত্ৰেয়ী পাটৰক জনাইছোঁ আন্তৰিক শুভকামনা। প্ৰতিটো গীতৰ দৰে তেওঁৰ এই গীতটিকো আঁকোৱালি লওক সকলোৱে, তাৰেই কামনা কৰিছোঁ।
Maitrayee Patar MusicalKadambari Creations
