“এইবাৰ ছবিগৃহ ক’লা-বগা হ’ব” বুলি নিজৰ প্ৰচাৰ কাৰ্যসূচী আৰম্ভ কৰা “Black N White” ৰ ট্ৰেইলাৰ তথা প্ৰমো’ সমূহে বহুলভাৱে দৰ্শকৰ সমাদৰ লাভ কৰিবলৈ আৰম্ভ কৰিছে। যোৰহাট, ডিব্ৰুগড়, মৰাণ তথা শিৱসাগৰকে আদি কৰি বহুঠাইত ছবিখনৰ কলা-কুশলীয়ে সক্ৰিয়ভাৱে নিজৰ প্ৰচাৰ কাৰ্যসূচী সমাপন কৰিছে। আনহাতে, আন এক সুখবৰ এয়াও যে বিগত ৬ বছৰৰ অন্তত ৰূপালী পৰ্দাত ৰবি শৰ্মাক দেখিবলৈ পোৱা যাব। ৰবি শৰ্মাৰ কথা অথবা পৰিকল্পনা সমূহক লৈ সদায় তেওঁৰ অনুৰাগী সকল উৎসাহ-উদ্দীপনাৰে বাট চাই থাকে। শেহতীয়াকৈ ছবিখনত ৰবি শৰ্মাক সঁহাৰি জনোৱাৰ অৰ্থে তেওঁৰ দুগৰাকী অনুৰাগীয়ে ৰঙিয়াত ছবিখনৰ প্ৰচাৰৰ বাবে বহুখিনি দায়িত্ব ল’লে। এগৰাকী অভিনেতাৰ অনুৰাগী হিচাবে তেখেত সকলৰ এই নিঃস্বাৰ্থ মৰমে আচলতে এগৰাকী অভিনেতাক “শিল্পী” ৰ পৰ্যায়লৈ লৈ যায়।
এতিয়া আহো আমি ছবিখনৰ কথালৈ, অসমীয়া ছবিৰ উত্তৰণ অথবা উত্থান সম্পৰ্কে বহুতে বিভিন্ন ধৰণে মন্তব্য কৰে। আমি প্ৰত্যেকেই নৱজাগৰণৰ কথা কওঁ, এইক্ষেত্ৰত নৱপ্ৰজন্মৰ প্ৰচেষ্টা-প্ৰয়াস আমি নুই কৰিব নোৱাৰোঁ। প্ৰতিদিনেই জনসাধাৰণক নতুনত্ব দিয়াত বিশ্বাসী একোগৰাকী নৱপ্ৰজন্মক আপুনি দেখিবলৈ পাব “Black N White” ত। পৰিচালক ধনজিৎ দাসৰ এই ছবিখনকো আপোনালোকে মৰম দিয়ক। ছবিখনৰ কলা-কুশলীয়ে দৰ্শকৰ পৰা ধনাত্মক সমালোচনা বিচাৰিছে বুলি ইতিমধ্যে তেওঁলোকে প্ৰকাশ কৰিছে। ২৪ ফেব্ৰুৱাৰীত বলীউডৰ এখন হাই-প্ৰফাইল ছবি “Selfie” য়ো লাভ কৰিব মুক্তি। “অসমীয়া ছবিয়ে “ঢৌ” নিবিচাৰে, সোঁত বিচাৰে”- এই ভাষ্য প্ৰদান কৰি অভিনেতা ৰবি শৰ্মাই অসমীয়া চিনেমা জগতখনক লৈ নিজৰ আশা ব্যক্ত কৰিছে। গতিকে এতিয়া আপোনালোকে বিচাৰ কৰিব লাগিব কোনখন ছবি আপোনালোকে চাব!
BLACK N WHITERavi SarmaSwagata Bharali Dhanjit Das Pallab Talukdar
