আপোনালোকে বাৰু জানেনে? “Black N White” ছবিখনৰ লগতে CND Play অনলাইন প্লেটফৰ্মটিত মুক্তি পাবলৈ সাজু হৈছে আন এখন অসমীয়া ছবিও। ইতিমধ্যে ছবিখনৰ নামটিয়েই এক বিশেষ আকৰ্ষণৰ সৃষ্টি কৰিছে। ছবিখনৰ নাম হৈছে “বুৰ্বকৰ খেল”। অহা ১ এপ্ৰিল, ২০২৩ তাৰিখে ছবিখন মুক্তি লাভ কৰিব উক্ত প্লেটফৰ্মটিত। আমি নৱপ্ৰজন্মৰ প্ৰতিভা সকলৰ কথা প্ৰায়ে পাতি আহিছোঁ। অৱশ্যে পাতিবলগীয়া কথাও, কিয়নো সাম্প্ৰতিক সময়ত নৱপ্ৰজন্মৰ এই প্ৰতিভাসম্পন্ন অভিনেতা-অভিনেত্ৰী সকলে বাৰুকৈয়ে সকলোকে আকৰ্ষণ কৰিছে। কেৱল তেওঁলোকৰ সুন্দৰ অভিনয়েই নহয়, যিকোনো এটা কাহিনীৰ সাৰমৰ্ম খিনি যথোপযুক্ত ৰাইজৰ মাজত দাঙি ধৰাত অতিকৈ পাৰ্গত হৈছে তেওঁলোক। উক্ত “বুৰ্বকৰ খেল” ছবিখনতো আপোনালোকে দেখিবলৈ পাব নৱপ্ৰজন্মৰ কেইবাগৰাকীও অভিনেতা-অভিনেত্ৰী তথা কলা-কুশলীক। ইতিমধ্যে ছবিখনৰ ৪ টা গীত সংযোজিত এটি এলবাম মুক্তি লাভ কৰিছে, য’ত কণ্ঠদান কৰিছে ক্ৰমে Nishant Ramteke, Kaysee & Minimi NL য়ে।
থ্ৰীলাৰধৰ্মী এই ছবিখনৰ পৰিচালক হৈছে অশ্বিন কেলকৰ। লগতে, ছবিখনৰ সহঃপৰিচালনা কৰিছে অংকুৰ ডেকা, সমৰ জ্যোতি চৰকাৰ আৰু অধিৰাজ কাশ্যপে। ছবিখনৰ দৃশ্যগ্ৰহণৰ দায়িত্বত আছে সথানন্দ ৰংগাৰাজ, হৰ্ষ গুপ্তা আৰু ৰবি ৰাজ মুৰ্মুৰে। আনহাতে, ছবিখনত অভিনয় কৰিছে ক্ৰমে জ্যোতি নাৰায়ণ নাথ, কুলদ্বীপ চহৰীয়া, অতনু মহন্ত, ৰঞ্জিতা বৰুৱা, ৰাজশ্ৰী শৰ্মা, পলাশ মেছ, ৰাজীৱ কলিতা, ৰনাল্ড হুচেইন, অংশুমান, মিনিমিৰ লগতে আন কেইবাগৰাকীও ন-পূৰণি শিল্পীয়ে। ছবিখনৰ শব্দত কাম কৰিছে অৰ্ণৱ বৰা, সতীশ তিৰিয়া, নিশান্ত ৰামটেকে আৰু ধ্ৰুৱ বড়োই। ছবিখন ইতিমধ্যে বিভিন্ন ৰাষ্ট্ৰীয়-আন্তঃৰাষ্ট্ৰীয় প্ৰেক্ষাপটৰ ছবি সমাৰোহলৈ প্ৰেৰণ কৰা হৈছে আৰু বিভিন্নজন ছবি সমালোচকৰ সমাদৰ লাভ কৰিবলৈও সক্ষম হৈছে।
ছবিখনৰ মুক্তিৰ বাবে অপেক্ষাৰত অসমীয়া চলচিত্ৰ প্ৰেমী ৰাইজ। ন্যূনতম এটি মাচুল পৰিশোধ কৰি ছবিখন চিএনডি প্লে’ ত উপভোগ কৰিব পাৰিব আপুনি। ছবিখনৰ সৈতে জড়িত সকলোকে আন্তৰিক শুভকামনা জ্ঞাপন কৰিছোঁ।
